हिंदू वारसा हक्क कायद्यानुसार संपत्तीचे वारसदार कोण असतात?

आयुष्यभर संपत्तीसाठी आणि मालमत्ता मिळवण्यासाठी वणवण केली जाते.

स्वतः कमावण्याबरोबरच आपल्या पूर्वजांच्या संपत्तीत ही त्यांच्या मृत्यूनंतर आपल्याला वाटा मिळावा असं प्रत्येकाला वाटतं.

मालमत्तेच्या बाबतीत पहायला गेलं तर कौटुंबिक भांडणांना अंतच नाही.

तुम्हांला माहीत आहे का? भारतात कोर्टात जितक्‍या केसेस पेंडिंग आहे त्यातल्या बऱ्याच केसेस या मालमत्तेच्या वाटणी संबंधी आहेत.

भारतीय कायद्यात “वारस” या संकल्पनेला मान्यता आहे.

वारस म्हणजे अशी व्यक्ती जिचा तिच्या पूर्वजांच्या संपत्तीमध्ये वाटा असतो.

हिंदू कायदा हा हिंदू, बौद्ध, जैन आणि शीख धर्मामध्ये जन्मलेल्या व्यक्तींसाठी लागू होतो.

त्याचबरोबर यापैकी कोणताही धर्म स्वीकारणाऱ्या व्यक्तीलाही हा कायदा लागू होतो.

लग्नानंतर एखाद्या व्यक्तीने या चार पैकी एखादा धर्म स्वीकारला असेल तर त्या व्यक्तीसाठीही हा हिंदु वारस कायदा लागू होतो.

हिंदू वारसाहक्क नुसार मृत व्यक्तीच्या संपत्तीचे 16 वारसदार असतात.

हे 16 वारसदार कोण कोणते हे जाणून घेऊया….

ज्याच्या नावावर स्थावर मालमत्ता, संपत्ती आहे अशी व्यक्ती मृत पावली आणि तिच्या नावावर असणारी संपत्ती जर वडीलोपार्जित असेल म्हणजे मृत व्यक्तीला वारसाहक्काने मिळालेली असेल तर अशा संपत्तीच्या वारसाची नोंद ही हिंदू वारसा कायदा 1956 नुसार होते.

या वडिलोपार्जित संपत्तीचं मृत्युपत्र करता येत नाही.

मात्र मृत व्यक्तीने संपत्ती स्थावर मालमत्ता स्वतः मेहनत करून मिळवलेली असेल तर आणि मृत्यूपूर्वी त्या व्यक्तींनं मृत्यूपत्र करून ठेवलं असेल तर त्या मृत्यूपत्रानुसार जी व्यक्ती पात्र आहे त्या व्यक्तीला संपत्ती मिळते.

मात्र मृत व्यक्तीचं मृत्यूपत्रच नसेल तर वारस हा हिंदू वारसा कायदा 1956 नुसार ठरवला जातो.

आजच्या लेखात आपण माहिती वाचतो आहे ती एखाद्या पुरुषाच्या मृत्युनंतर ठरवल्या जाणाऱ्या वारसांविषयीची आहे

एखाद्या महिलेच्या संपत्तीचे वारसदार हा एक स्वतंत्र विषय आहे.

हिंदू वारसा कायदा 1956 कलम 8 नुसार वर्ग एक चे वारसदार

1) मुलगा

2) मुलगी

3) विधवा (मृत व्यक्तीची पत्नी) (एकापेक्षा जास्त असतील तर सर्वांना एकत्रित वाटा)

4) आई

5) पूर्व मृत मुलाचा मुलगा (नातू) म्हणजे निधन झालेल्या (हयात नसलेल्या) मुलाचा मुलगा (नातू)

6) पूर्व मृत मुलाची मुलगी (नात)

7) पूर्व मृत मुलाची विधवा (सून)

8) पूर्व मृत मुलीचा मुलगा. (नातू)

9) पूर्व मृत मुलीची मुलगी (नात)

10) पूर्व मृत मुलाच्या पूर्व मृत मुलाचा मुलगा (पणतू)

11) पूर्व मृत मुलाच्या पूर्व मृत मुलाची मुलगी (पणती)

12) पूर्व मृत मुलाच्या पूर्व मृत मुलाची विधवा (नातसून)

13) पूर्व मृत मुलीच्या पूर्व मृत मुलीचा मुलगा (पणतू)

14) पूर्व मृत मुलीच्या पूर्व मृत मुलीची मुलगी ( पणती)

15) पूर्व मृत मुलाच्या पुर्व मृत मुलीची मुलगी (पणती)

16) पूर्व मृत मुलाच्या पुर्व मृत मुलीचा मुलगा (पणतू)

सदर लेख अथवा लेखातील कुठल्याही भागाचे छापील, इलेक्ट्रॉनिक माध्यमात परवानगीशिवाय पुनर्मुद्रण किंवा कुठल्याही सोशल मीडियात कॉपी-पेस्ट करून पुनर्लेखन करण्यास सक्त मनाई आहे. याचे उल्लंघन केल्याचे आढळल्यास कायदेशीर कारवाई करण्यात येईल.

या आणि अशा वैविध्यपूर्ण लेखांचे अपडेट्स मिळविण्यासाठी आमचे फेसबुक पेज मनाचेTalks ला नक्की लाईक करा. आणि लेखांचे अपडेट्स व्हाट्स ऍप वर मिळवण्यासाठी येथे क्लिक करा  / टेलिग्रामवर संवाद साधण्यासाठी येथे क्लिक करा