म्युच्युअल फंडातील गुंतवणूक – गैरसमज आणि तथ्ये

mutual-fund

जाणून घ्या म्युच्युअल फंडातील गुंतवणुकीबाबत असणारे ९ वेगवेगळे गैरसमज आणि त्यातील सत्यता.

तुम्ही म्युच्युअल फंडात गुंतवणूक करण्याचा विचार करत आहात का? काही गैरसमज असल्यामुळे तुमच्या मनात भीती निर्माण झाली आहे का? असे असेल तर गैरसमज दूर करून म्युच्युअल फंड गुंतवणूकीतील तथ्ये जाणून घेण्यासाठी हा लेख संपूर्ण वाचा.

सध्या सगळीकडे म्युच्युअल फंडात गुंतवणूक करा असा सल्ला देणारे भरपूर लोक दिसतात. या विषयावर सगळीकडे भरपूर चर्चा होताना दिसते. म्युच्युअल फंडातील गुंतवणुक हा खरेतर आर्थिक गुंतवणुकीचा एक सुरक्षित आणि स्मार्ट उपाय आहे.

या विषयातील थोडीशी समज, गुंतवणूक करण्यातली शिस्त आणि नियमितपणा तसेच दीर्घ काळ गुंतवणूक करण्याचा संयम या गोष्टींच्या आधारे म्युच्युअल फंडात गुंतवणूक करून भरपूर संपत्ती निर्माण करता येऊ शकते.

सध्या उपलब्ध असणाऱ्या आर्थिक गुंतवणुकीच्या योजनांपैकी म्युच्युअल फंडातील गुंतवणूक ही खरेतर सर्वात सुरक्षित आणि उत्तम पद्धत आहे परंतु तरीही भारताच्या लोकसंख्येपैकी केवळ 31% लोक गुंतवणूक करण्यासाठी या पर्यायाचा वापर करतात. इतक्या कमी प्रमाणात लोक गुंतवणुकीसाठी म्युच्युअल फंडाची निवड करतात यामागे त्या संदर्भात असणाऱ्या गैरसमजांचा मोठा वाटा आहे.

केवळ असे गैरसमज असल्यामुळे म्युच्युअल फंड गुंतवणुकीपासून लोकांनी दूर राहावे हे योग्य नाही. म्हणूनच आज आम्ही असे सर्व गैरसमज दूर करून त्यातील तथ्ये सांगणारा लेख घेऊन आलो आहोत.

म्युच्युअल फंडाबद्द्ल असणारे गैरसमज खालीलप्रमाणे

१. म्युच्युअल फंडात गुंतवणूक करणे अतिशय जोखमीचे असते कारण ती गुंतवणूक शेअर्समध्ये केली जाते.

तथ्य – म्युच्युअल फंडात केली जाणारी सर्व गुंतवणूक शेअर्समध्ये केली जाते ही गोष्ट सत्य नाही. वेगवेगळे म्यूचुअल फंड शेअर्स व्यतिरिक्त इतरही प्रकारची गुंतवणूक करतात ज्यामध्ये डेट फंड, हायब्रीड फंड, सोने या सर्वांचा समावेश होतो. याचा अर्थ काही म्युच्युअल फंड केवळ शेअर्समध्ये गुंतवणूक करत असले, तरी इतर काही प्रकारचे म्युच्युअल फंड गुंतवणुकीसाठी सुरक्षित देखील असतात.

आपल्याला ज्या प्रकारचा आर्थिक परतावा अपेक्षित असेल आणि ज्या प्रकारची जोखीम घेणे शक्‍य असेल त्यानुसार अशी गुंतवणूक अवश्य करावी.

२. न्यू फंड ऑफर (NFO) हे आधीपासून सुरू असणाऱ्या म्युच्युअल फंडांपेक्षा स्वस्त असतात.

तथ्य – नव्याने सुरू होणारा म्युच्युअल फंड (NFO) सुरुवातीला कमी किंमतीला उपलब्ध असतो, त्यामुळे त्यामध्ये गुंतवणूक करणे स्वस्त पडते असे लोकांना वाटते.

परंतु आधीपासून सुरू असणाऱ्या म्युच्युअल फंडांचा NAV जरी जास्त असला तरी तो त्या फंडाने आतापर्यंत मिळवलेल्या नफ्यामुळे असतो.

सुरू असणाऱ्या म्युच्युअल फंडाचा परफॉर्मन्स चांगला असल्यामुळे त्याचा NAV जास्त असतो. दीर्घकालीन गुंतवणुकीमध्ये नवीन फंड अथवा आधीपासून सुरू असणारा फंड या दोघांचाही परफॉर्मन्स एकसारखाच दिसतो.

३. कमी NAV असणारे म्युच्युअल फंड गुंतवणुकीसाठी जास्त चांगले असतात 

तथ्य – बऱ्याच गुंतवणूकदारांचा असा समज असतो की ज्या म्युच्युअल फंडाचा एन ए व्ही म्हणजे ‘नेट ऍसेट व्हॅल्यू’ कमी असेल त्या म्युच्युअल फंडात गुंतवणूक करण्यामुळे जास्त फायदा होऊ शकेल. परंतु हे सत्य नाही. म्युच्युअल फंडाचा परफॉर्मन्स त्याच्या कमी अथवा जास्त एन. ए. व्ही. वर अवलंबून नसून, त्यांच्या फंड मॅनेजरने केलेल्या योग्य गुंतवणुकीवर अवलंबून असतो. ज्या म्युच्युअल फंडांचा ट्रॅक रेकॉर्ड चांगला आहे अशाच म्युच्युअल फंडात गुंतवणूक करावी.

४. डिमॅट अकाउंट असल्याशिवाय म्युच्युअल फंडात गुंतवणूक करता येत नाही 

तथ्य – म्युच्युअल फंडात गुंतवणूक करण्यासाठी डीमॅट अकाऊंट असणे आवश्यक नाही. म्युच्युअल फंडात गुंतवणूक करण्यासाठी स्वतः त्यांच्या वेबसाइटवरून गुंतवणूक करता येते किंवा एखाद्या गुंतवणूक सल्लागार अथवा बँकेतर्फे देखिल अशी गुंतवणूक करता येते.

५. म्युच्युअल फंडात गुंतवणूक करण्यासाठी खूप मोठ्या रकमेची आवश्यकता असते 

तथ्य – हे अजिबात खरे नाही की म्युच्युअल फंडात गुंतवणूक करण्यासाठी मोठ्या रकमेची आवश्यकता असते. अगदी कमी रकमेपासून म्युच्युअल फंडात गुंतवणूक करता येऊ शकते. दरमहा रुपये ५००/- इतक्या थोड्या रकमेने सुद्धा म्युच्युअल फंडात सिस्टिमॅटिक इन्व्हेस्टमेंट प्लॅन घेता येऊ शकतो.

काही म्युच्युअल फंड तर रुपये १००/- इतक्या कमी किमतीची गुंतवणूक देखील करू देतात. म्युच्युअल फंडात दर महिन्याला ठराविक रक्कम गुंतवणे किंवा एकदाच काही रक्कम गुंतवून त्यावरील आर्थिक परतावा मिळवणे अशा दोन्ही प्रकारे गुंतवणूक करता येते.

६. म्युच्युअल फंडात गुंतवणूक करणे जोखमीचे नाही 

तथ्य – कोणतीही आर्थिक गुंतवणूक थोडीफार तरी जोखमीची असतेच. त्यामुळे म्युच्युअल फंडातील गुंतवणूक देखील काही अंशी जोखमीची असते. म्युच्युअल फंडातील शेअर्समधील गुंतवणूक काही अंशी जोखमीची असते परंतु हायब्रीड आणि डेट फंडातील गुंतवणुकी तितक्या जोखमीचा नसतात.

फिक्स इन्कम म्युच्युअल फंड देखील जोखमीचे नसतात. याचा अर्थ म्युच्युअल फंडातील गुंतवणूक करताना योग्य तो अभ्यास करून कमी जोखमीच्या फंडात आपली गुंतवणूक करावी. अर्थात जितकी जोखीम कमी तितका परतावा कमी आणि जितकी जोखीम जास्त तितका परतावा जास्त हा मंत्र येथे लागू पडतो. त्यामुळे पूर्ण अभ्यास करून, तुमच्या जोखीम पत्करण्याच्या क्षमतेनुसार गुंतवणूक करणे योग्य ठरते.

७. सगळे म्युच्युअल फंड लॉंग टर्म म्हणजे दीर्घकालीन गुंतवणुकीसाठी योग्य असतात

तथ्य – सगळे म्युच्युअल फंड दीर्घकालीन गुंतवणुकीसाठी योग्य असतात असे म्हणणे योग्य ठरणार नाही. इक्विटी फंड म्हणजे शेअर्समध्ये गुंतवणूक करणारे म्युच्युअल फंड दीर्घकालीन गुंतवणुकीसाठी योग्य असतात.

तर अग्रेसिव हायब्रीड फंड तीन ते पाच वर्षांच्या गुंतवणुकीसाठी योग्य असतात. तेवढ्या कालावधीतच ते चांगला परतावा देऊ शकतात.

डेट फंडातील गुंतवणूक छोट्या कालावधीसाठी योग्य मानली जाते. डेट फंडातील गुंतवणूक ही बँकेतील एफ डी प्रमाणे काही महिने ते काही वर्ष या कालावधीसाठी योग्य ठरते.

८. कोणत्याही म्युच्युअल फंडात गुंतवणूक केल्यास इन्कम टॅक्समध्ये सवलत मिळते

तथ्य – सगळे म्युच्युअल फंड इन्कम टॅक्स डिडक्शनसाठी पात्र ठरत नाहीत. इन्कम टॅक्सच्या सेक्शन ८० C अंतर्गत फक्त टॅक्स सेव्हिंग म्युच्युअल फंडचा समावेश होतो. अशा म्युच्युअल फंडांना इक्विटी लींक सेविंग स्कीम असे देखील म्हणतात. अशा पद्धतीच्या म्युच्युअल फंडांचा परतावा लाइफ इन्शुरन्स पॉलिसी, पब्लिक प्रोविडेंट फंड, नॅशनल सेविंग स्कीम यांपेक्षा जास्त असल्याचे आढळून आले आहे.

९. स्वतः म्युच्युअल फंडातील तज्ञ असल्याशिवाय किंवा कोणत्यातरी सल्लागाराशिवाय म्युच्युअल फंडात गुंतवणूक करता येत नाही 

तथ्य – हे सत्य नाही. सुरुवातीला जरी म्युच्युअल फंडातील गुंतवणूक काहीशी गुंतागुंतीची आणि अवघड वाटली तरी थोड्या कालावधीतच नवख्या गुंतवणूकदाराला सुद्धा त्याची संपूर्ण माहिती होऊ शकते.

बहुतेक सर्व म्युच्युअल फंडात स्वतः गुंतवणूक करता येऊ शकते. कोणत्याही एजंट अथवा सल्लागाराची आवश्यकता भासत नाही. म्युच्युअल फंडातील गुंतवणूकींचा सर्वसाधारण अभ्यास करून योग्य फंडात गुंतवणूक करणे सहज शक्य आहे. परंतु हे देखील तितकेच खरे की अवास्तव जोखीम पत्करू नये.

तर हे आहेत म्युच्युअल फंडातील गुंतवणुकीबाबतचे नऊ गैरसमज आणि त्या बाबतीतील सत्य.

यावरून आपल्या हे लक्षात येते की थोडा अभ्यास करून आणि आपल्याला नेमका किती आणि केव्हा आर्थिक परतावा अपेक्षित आहे याचा विचार करून योग्य पद्धतीने म्युच्युअल फंडात गुंतवणूक केल्यास ती अतिशय लाभदायी ठरू शकते.

म्युच्युअल फंडातील गुंतवणुकीतून मोठी संपत्ती निर्माण करणे अगदी सर्वसामान्य गुंतवणूकदाराला देखील सहज शक्य आहे. अतिशय थोड्या रकमेपासून गुंतवणुकीस सुरुवात करून मोठी रक्कम उभी करणे म्युच्युअल फंडातील गुंतवणुकीमुळे शक्य होते. अर्थात, जोखमीचा अभ्यास करून मगच गुंतवणूक करणे श्रेयस्कर.

या लेखातील माहिती तुम्हाला कशी वाटली हे आम्हाला कमेंट करून नक्की सांगा. तसेच ही माहिती जास्तीत जास्त लोकांपर्यंत पोहोचावी म्हणून हा लेख शेयर करायला विसरू नका.

Manachetalks

सदर लेख अथवा लेखातील कुठल्याही भागाचे छापील, इलेक्ट्रॉनिक माध्यमात परवानगीशिवाय पुनर्मुद्रण किंवा कुठल्याही सोशल मीडियात कॉपी-पेस्ट करून पुनर्लेखन करण्यास सक्त मनाई आहे. याचे उल्लंघन केल्याचे आढळल्यास कायदेशीर कारवाई करण्यात येईल.

या आणि अशा वैविध्यपूर्ण लेखांचे अपडेट्स मिळविण्यासाठी आमचे फेसबुक पेज मनाचेTalks ला नक्की लाईक करा. आणि लेखांचे अपडेट्स व्हाट्स ऍप वर मिळवण्यासाठी येथे क्लिक करा  / टेलिग्रामवर संवाद साधण्यासाठी येथे क्लिक करा

Leave a Reply

Your email address will not be published.

This site uses Akismet to reduce spam. Learn how your comment data is processed.

error: © Copyrights 2022. All rights reserved!